རྡོ་རྗེ་འཆང་དང་དབྱེར་མེད་པའི།།
བླ་མ་རྣམས་ལ་ཕྱག་འཚལ་ལོ།།
ང་སྤྲང་པོའི་དྲན་པ་འདི་ལྟར་ཤར།།
འཁོར་བ་རང་བཞིན་མེད་པར་ཤེས།།
ཆོས་བརྒྱད་བརྩེག་པའི་བློ་དང་བྲལ།།
མྱ་ངན་འདས་པ་ལོག་ན་མེད།།
སངས་རྒྱས་རང་གི་སེམས་ལ་རྙེད།།
གྲུབ་པ་ཐོབ་འདོད་བློ་དང་བྲལ།།
རྟོག་པ་ཆོས་སྐུའི་རང་བཞིན་ལ།།
བཟང་ངན་འབྱེད་པའི་བློ་དང་བྲལ།།
སྲིད་ཞི་དབྱེར་མེད་དོན་གཅིག་རྟོགས།།
ས་སྐབས་དབྱེ་བའི་བློ་དང་བྲལ།།
ཕྱག་རྒྱ་བཞི་ལྡན་དོན་གཅིག་རྟོགས།།
དགག་སྒྲུབ་གཉིས་ཀྱི་བློ་དང་བྲལ།།
བདེན་གཉིས་དབྱེར་མེད་དོན་གཅིག་རྟོགས།།
ལམ་ལྔ་བགྲོད་པའི་བློ་དང་བྲལ།།
སེམས་ཉིད་ཆོས་སྐུའི་རང་ས་ཟིན།།
ས་ཚུགས་བཟུང་བའི་བློ་དང་བྲལ།།
གཅིག་ཤེས་ཀུན་གྲོལ་རྟོགས་པ་སྐྱེས།།
ཐོས་བསམ་ཟེར་བའི་བློ་དང་བྲལ།།
གཟུགས་སྣང་སྒྱུ་མའི་ལུས་སུ་ཤེས།།
གཅེས་པར་འཛིན་པའི་བློ་དང་བྲལ།།
སྒྲ་གྲག་སྟོང་ཤེས་པའི་གོ་བ་བྱུང་།།
(བཤེ་བསྐུར)་ལ་འཁྲུགས་པའི་བློ་དང་བྲལ།།
རང་སར་བཞག་པའི་ཆོས་ཉིད་ལ།།
ཐུན་མཚམས་དབྱེ་བའི་བློ་དང་བྲལ།།
ཁོ་བོའི་སེམས་ལ་འདི་ལྟར་གདའ།།
བུ་ཡང་འདི་ལྟར་མཁྱེན་པར་མཛོད།།
ཅེས་ཉེ་གནས་ཡོན་ཏན་འོད་ལ་འདི་ལྟར་གདམས་སོ།།
